Serbske ludowe spěwy

Nikom’ se na swěśe górjej njejźo

2. Ako tym bogim syrotkam,
kenž nana, muterki njamaju.

3. Nichten jich njebuźo zagroniś,
miłego słowka zastajiś.

4. Ga źe ty zagranjaj, miły Bog,
a glědaj na nje z njebja dołoj.

5. Muterku z dwóru wen njasechu,
wjele tam luźi za njej źo.

6. Muterku na kjarchob njasechu,
źiśi tak žałosnje płakachu.

7. Muterku do rowa stajachu,
źiśi ruce k njebju zwigachu.

8. »Wšykne te luźe domoj du:
Naša ta muterka niźi njej’.«

9. Źiśi se domoj zejźechu,
wšykne tak wjelgin płakachu.

10. Staršy bratš běšo mudrjejšy.
Gronjašo: »Mjelcćo, njepłacćo!

11. Bog ten jo hyšći na njebju,
wón źo nas wšyknych zažarbowaś.«

* * *

12. Nikom’ se na swěśe górjej njejźo,
ako tym chudym wudowam.

13. Ako tym chudym wudowam,
kenž swójich rownja njamaju.

14. Nichten jich njebuźo zagroniś,
miłego słowka zastajiś.

15. Ga źe ty zagranjaj, miły Bog,
a glědaj na nje z njebja dołoj.