1. Přadła Marja kudźałku,
kudźałku židźanu.
Prěnju je nitku napřadła,
kudźałku dopřadła.

2. Šiła je Marja košulku,
košulku židźanu.
Prěni je šowčik zešiła,
košulku došiła.

3. Šła je tam Marja do cyrkwje,
do cyrkwje Božeje.
Wona je paćerje spěwała,
k Bohu so modliła.

4. K njej stej tam přišłoj dušce dwě,
stej so nutř kłapałoj:
»Pušć naju, swjata Marja, nutř,
Marja, maćer Boža.«

5. »Nutř waju pušćić njemóžu,
jandźelki rejuja tu
we swojich židźanych košulkach,
we wěnčkach zelenych.«

6. Marja ta reje wjedźeše
ze swojim dźěćatkom,
tak wona Bohu so lubješe.
Jandźelki sćěh’wachu.