1. Za serskeju gólku
jadno wjazorasko.
Co ga w wjazorasku?
Grozna palowaka.

2. Ta pak kśěšo na raz
ceło město póžrěś.
Kěžor, ten tek źašo:
»Ja mam jadnu kněžnu.

3. Gaž na nju rěd pśiźo,
ga dam ja ju teke.«
Rěd wokoło źěšo,
na jog’ kněžnu pśiźo.

4. Kněžna ze jśpy źěšo,
dobru noc dawašo:
»Dobru noc nět mějśo,
wy mój nan, mój stary!

5. Pšošćo za mnje Boga,
ja cu teke za was,
aby zasej pśišła,
strowe se rozgronili.«

6. Kněžna z dwóru źěšo,
dobru noc dawašo:
»Dobru noc nět mějśo,
wšykna dobra celaź!

7. Pšošćo za mnje Boga,
ja cu teke za was,
aby zasej pśišła,
strowe se rozgronili.«

8. Kěžorowa kněžna
k wjazoroju źěšo,
grozna palowaka
ku brjogoju plěšo.

9. »O, ty swěty Juriš,
stoj mě na pomoce!«
»O, ty luba kněžna,
wěriš ty we Boga?«

10. »Kak ga ja we Boga
wěriś njedejała?
Wón jo za nas wumrěł,
kšej jo za nas pśelał.«

11. »O, ty luba kněžna,
wotpasaj se swój pas,
comej jen zaźernuś,
za to kłusto šyjsko.

12. Za to kłusto šyjsko,
za kłusto gjarlisko.«
Běrtlowali su ju,
do wóza ju kładli.

13. Styržasća pór kóń su
wóni zapśěgnuli,
hyšćer palowaku
njejsu z města gnuli.

14. Tśižasća pór kóń su
wóni pśipśěgnuli,
pótom palowaku
lěbda z města gnuli.

15. Wjadli su ju, wjadli,
pśez Barlinske mósty.
Wše Barlinske mósty
tšachy se gibachu.

16. Wše Barlinske luźe
tšachy wuměrachu,
wše Barlinske źěśi
do mórja skokachu.

17. »Njebojśo se, luźe!
Wóna njejo žywa,
wóna njejo žywa,
ale běrtlowana.«