Serbske ludowe spěwy

Ja wiźim jaden zeleny bom

W originalnej zběrce njejsu noty k tekstej podate.

1. Ja wiźim jaden zeleny bom,
ja pśez njen derje wiźim.
Ja wiźim mójog’ lubego
pśi jadnej drugej stojecy.

2. »A źo ga sy ty cora był,
až njejsy ku mnjo pśišeł?«
»To som śi cynił k lěpšemu,
až ja som śi dał z měrom spaś.«

3. »A wót spanja ty wjele wěš
a sam ty derje njespiš.
Ja som śi derje wiźeła,
až ty sy z fryje domoj šeł.«