1. Jěli su kněža na gósćinu,
kněžnicku su zgubili,
jěli su mimo formani,
kněžnicku su wiźeli.

2. Na běłym pěsacku seźecy,
z cerjenym jabłuškom zejgrawacy.
Do kjarcmy su ju pśiwjadli,
w piwje, winje pśepili.

3. Pśirejtowali tam rejtarje,
kśěli byś nocowane.
Jaden se zebrał z tych rejtarjow,
kjacmaŕki se wopšašał:

4. »Kjacmaŕka, luba kjacmaŕka,
jo-li to waša źowka,
jo-li to waša hegen źowka,
abo jo słužabna?«

5. »To źem njej’ naša hegen źowka,
teke njej’ słužabna,
to su ju formani pśiwjadli,
w piwje, winje pśepili.«

6. »Kjacmaŕka, luba kjacmaŕka,
pśiwdajśo mě pśi njej spaś.
Mója ta wóla k tomu jo,
jo-li tog’ źowcyšća.«

7. Kjacmaŕka póstolku sćelašo
rejtaŕ jej swěćašo.
Kjacmaŕka póstolku spósćelašo,
rejtaŕ swěcku zagase.

8. Do poł nocy derje spaštej,
po poł nocy se rozgranjaštej.
Rejtaŕ ten chopił źowčo pšašaś:
»Wotkel ga sy, Ancycka?«

9. »Ja som źen ta młodša źowka
teg’ pana Wintembórskeg’.«
»Sy ty teg’ pana młodša źowka,
ja sym jog’ młodšy syn.

10. Som śi ja pytał tśinasće lět,
zarejt’wał styrnasće kóń.
Něnt aklej som śi ja namakał,
až sy mója młodša šotša.«

11. Kjacmaŕka źowčo górjej woła:
»Swita, swita, źeń bywa,
stawaj mě górjej, ty njewjesta,
ty młoda góspoza.«

12. »Ja njejsom žedna njewjesta,
tek žedna góspoza.
Gab ten mój staršy bratš njebył,
wěnašk by zgubiła.«

13. »Gaž to jo ten twój staršy bratš,
źo maš nana, móterku?«
»Nana tog’ mam ja na rynku,
teke tam móterku.«

14. Na rynk tam wónej pśijěźeštej,
pśed dwórom zastaštej:
»Wotcynajśo te nowe wrota,
ja wjedu rědnu młodu.

15. Ja wam nět wjedu rědnu młodu,
sebje dobru góspozu.«
»Nam njejo trjobna žana młoda,
tek žana góspoza.«

16. »Ja wam nic njewjedu rědnu młodu,
sebje dobru góspozu.
Wotcynajśo te nowe wrota,
ja wjedu młodšu sotšu.«

17. Móterka šćažku sćelašo
ze žyźim zelenym.
»Njesćelśo šćažki ze žyźim,
ja som nawucona pó parje hyś.«

18. »Rozuwaj se ty burske crjeje,
wobuwaj se bergaŕske.
Zeblekaj se ty bursku drastwu,
woblekaj se bergaŕsku.«