1. Chodźił je Bóh wjeršny
po šěrokim swěći,
po šěrokim swěći,
po dalokim kraju.

2. Nadejšoł, nadejšoł
jenu mału chěžku,
we tej małej chěžcy
tajku chudu wudowu.

3. »Hospoduj nas, hospoduj,
ty chuda wudowa.«
»Hospodować chcu was,
žanoh chlěba nimam.«

4. »Njestaraj so wo chlěb,
teho chcu nakupić,
teho chcu nakupić
za třicyći pjenjez.«

5. »Za třicyći pjenjez
to nic njeje wjele,
to nic njeje wjele,
tež nic njeje mało.«

6. »Kotři sće wy bjez wami,
kiž nam chlěba přinjesće,
kiž nam chlěba přinjesće
za třicyći pjenjez?«

7. Judaš běše spěšny:
»Mištrje, ja chcu po njón hić.«
Judaš dźěše po chlěb
po židowskej hasy.

8. Židźi, ći tam hrajachu
pod jenej piwnej kadźiju,
Judaša sobu wabjachu:
»Pój, sadź z nami, Judašo!«

9. »Sadźu aby njesadźu,
tola wšitko přěhraju.«
Prěni króć Judaš sadźi,
zmolom wšitko doby.

10. Druhi króć Judaš sadźi,
zmolom wšitko doby.
Třeći króć Judaš sadźi,
zmolom wšitko přěhra.

11. »Přečo sy pak tola,
Judašo, tak zrudny?
Předaj swojoh mištra
za třicyći pjenjez.

12. Za třicyći pjenjez,
to nic njeje droho,
to nic njeje droho,
tež nic njeje tunje.«

13. »Kotři sće wy bjez wami,
kiž sće mje předali?
Předali sće mje, předali,
droho sće mje njedali.«

14. Swjaty Jan tón dźeše:
»Knježe mištrje, sym da ja?«
»Jano, swjaty Jano,
ty drje tola njejsy.«

15. Swjaty Pětyr dźeše:
»Knježe mištrje, sym da ja?«
»Pětrje, swjaty Pětrje,
ty drje tola njejsy.«

16. Falšny Judaš dźeše:
»Knježe mištrje, sym da ja?«
»Judašo, falšny Judašo,
to drje sam najlěpje wěš.«

17. Judaš běše spěšny,
běžeše so wójběsnyć.
Wón so jara kaješe
a so jara rudźeše.

18. Bóh tón za nim wołaše:
»Wróć so zaso, Judašo!
Hrěchi su ći wodate,
štrafa je ći spušćena.«

19. Judaš přeco běžeše,
naběža sej jědleńku:
»Jědleńka to mjechke drjewo,
ta mje nje’dźe wobdźeržeć.«

20. Judaš přeco běžeše,
naběža sej wosycu:
»Wosyca to twerde drjewo,
ta budźe mje wobdźeržeć.«

21. Wójběsnył so falšny Judaš
na wosycu, twerde drjewo.
Wosyca žri a třepoce,
k sudnom dnju so hotuje.