1. Sym Serbow serbske holičo,
mi Hanka rěkaja,
a wjes’le sebi spěwajo
mam spěšnosć do dźěła.

2. Hdyž škowrončk ranko zaspěwa,
mi spěwa k stawanju,
a jědu-li do dźećela,
z nim spěwam napřemo.

3. Na mjezu jězdźu zelenu,
serp tupy wótřu sej
a žněju trawku rosojtu
na mjezy kwětkojtej.

4. A hdyž so ručka womača
w tej trawce rosojtej,
mi pjeršćeń mój so błyskota
na ručce na mokrej.

5. Tón pjeršćeń mam wot lubeho,
rjaneho pachoła,
k nam wječor, hdyž so zasměrk’ło,
mój luby přichadźa.

6. Sym w zymje k nowej košulcy
a k płatej napřadła,
płat dawno je žno natkany,
płat trjebam njewjesta.

7. Tež pjerjo je wšo wudrjene
na dołhich wječorach,
tuž poslešća mam hotowe
we swojich komorkach.

8. Za čerwjeny bant na hłowi
chcu měć wěnc rućany,
mać budźe čěpcow kupić mi
za drohe pjenjezy.

9. Mi družčić budźa holiča,
te wjesne towarški,
a budźe kwasna hosćina
přez tři dny zaspochi.