1. »Holčo, chceš-li naše zwostać,
cuzoh kraja nawědźić,
da dyrbiš ty synka podjeć,
přeco čista knježna być.«

2. »Hdyž ja dyrbju synka podjeć,
přeco čista knježna być,
da dyrbiš kolebku dźěłać,
žanoh rěza njerěznyć.«

3. »Hdyž dyrbju kolebku dźěłać,
žanoh rěza njerěznyć,
da dyrbiš ty pjelchi płokać,
bjez módła a bjez wody.«

4. »Hdyž ja dyrbju pjelchi płokać,
bjez módła a bjez wody,
da dyrbiš mi hnydom prajić,
hdźe mój młódsi bratřik je.«

5. »Hdyž ja dyrbju hnydom prajić,
hdźe twój młódsi bratřik je,
da dyrbiš ty wot włosancy
rjanu, ćeńku židu přasć.«

6. »Hdyž ja dyrbju wot włosancy
rjanu, ćeńku židu přasć,
da dyrbiš mi bjez křiwizny
dźěłać wrjećeno wot sćiny.«

7. »Hdyž ja dyrbju bjez křiwizny
dźěłać wrjećeno wot sćiny,
da dyrbiš mi hwězdy ličić,
kiž mi swěća na njebju.«

8. »Hdyž ja dyrbju hwězdy ličić,
kiž ći swěća na njebju,
da dyrbiš mi rebyl dźěłać,
zo po nim horje polězu.«

9. »Hdyž ja dyrbju rebyl dźěłać,
zo po nim horje polězeš,
da dyrbiš mi krjepki ličić,
kiž mi dele padaja.«

10. »Hdyž ja dyrbju krjepki ličić,
kiž ći dele padaja,
da dyrbiš mi jamki dźěłać,
zo ’dźa we nich zwostawać.«

11. »Hdyž ja dyrbju jamki dźěłać,
zo ’dźa we nich zwostawać,
da dyrbiš zwěrinu ličić,
kiž we wšitkej holi je.«

12. »Hdyž dyrbju zwěrinu ličić,
kiž we wšitkej holi je,
da dyrbiš mi płoty dźěłać,
zo ’dźa po nich běhaći.«

13. »Tón króć, ale ženje wjacy
z rjanej knježnu prawować,
ženi wjacy, nihdy wjacy
z mudrej knježnu prawować.«