Serbske ludowe spiwy

Hnał je wowčer wowcy won

W originalnej zběrce njejsu noty k tekstoju pódane.

1. Hnał je wowčer wowcy won
na tu pastwu zelenu.

2. Na pastwu wón popřihnał,
słyšał dźěćo płakaći.

3. »Moje lube dźěćatko,
słyšu ja će, njewidźu.«

4. »Ja sym w jednej starej wjerbje
z hałuzami přikryte.

5. Wućehń mje, mój wowčerjo,
njes mje do kwasneje chěže.

6. Moja mać ma dźensa kwas,
a je w’ wěncu zelenym.«

7. »Dobry wječor, kwasni hosćo.
Njewjesta je moja mać.

8. Dźewjeć je nas porodźiła,
dźesate ma pod wutrobu.«

9. »Dyrbju ja być twoja mać,
dyrbi čert přińć z woknom nutř.

10. Zeleny wěnc mi dele storhnyć,
helsku reju ze mnu hić.«

11. Lědom běše wurěčała,
přińdźe čert, hlej, z woknom nutř.

12. Zeleny wěnc jej dele storhny,
z woknom won z njej wuleća.